Mat 8 | KPG | STEP | Di haneia o Jesus i tomo di gonduu, digau dogologo nogo daudali a mee.

a 8.4:Lev 14.1-32

b 8.11:Lk 13.29

c 8.12:Mt 22.13, 25.30; Lk 13.28

Matthew 8

Jesus e hagahili taane magi genegene

(Mark 1.40-45; Luke 5.12-16)

1 Di haneia o Jesus i tomo di gonduu, digau dogologo nogo daudali a mee. 2 Taane magi genegene ga hanimoi gi mee, ga dogoduli gi lala i mua o mee, ga helekai, “Meenei, maa goe e hiihai, goe e mee di haga madammaa au.” 3 Jesus ga daahi adu dono lima ga bili gi mee, ga helekai, “Uaa, au e hiihai. Madammaa!” Di madagoaa hua deelaa, gei di magi o maa gu hili. 4 Jesus ga helekai gi mee, “Hagalongo! Hudee hagi ang gi tangada. Hana haga huudonu gi tangada hai mee dabu gi haga dina ina goe, gei goe wanga ina dau tigidaumaha dela gu lawa di haga modongoohia go Moses e haga modongoohia gi nia daangada bolo goe gu madammaa.” ^a

Jesus e hagahili di magi di hege tagi dauwa Rome

(Luke 7.1-10)

5 Di ulu adu o Jesus gi Capernaum, tagi dauwa o Rome ga heetugi gi mee, ga dangi anga i di hagamaamaa, 6 “Meenei, dagu dangada hai hegau e moe i dogu hale e magi pale, e mmae huoloo.” 7 Jesus ga helekai gi mee, “Au ga hana, ga hagahili laa a mee.” 8 Tagi dauwa ga helekai, “Deeai, Meenei. Au e de tau loo di hai goe gi ulu gi lodo dogu hale. Helekai hua, gei dagu dangada hai hegau la ga hili. 9 Au tangada labelaa e noho i lala nia mogobuna ogu dagi, gei au e dagi labelaa agu gau dauwa. Au ga helekai gi tangada i digaula boloo: Hana, gei mee e hana. Gei au ga helekai gi tangada boloo: Hanimoi, gei mee e hanimoi. Gei au ga helekai gi dagu hege boloo: Heia di mee deenei, gei mee e hai.” 10 Jesus gu goboina huoloo dono hagalongo gi di mee deenei, ga helekai gi digau ala nogo daudali ia, “Au e hagi adu gi goodou di tonu bolo au digi gidee loo tangada hagadonu beenei i Israel. 11 Au e hagi adu gi goodou bolo digau dogologo e lloomoi i bahi i-dua mo i bahi i-dai, ga noho dalia a Abraham, Isaac mo Jacob i tagamiami i Tenua o God di Langi. ^b 12 Gei digau ala belee ulu i Tenua o God, ga kili gi daha gi lodo di bouli dongoeho, di gowaa dela e tangitangi ai, gei e gadigadi nadau niha.” ^c 13 Jesus ga helekai gi tagi dauwa, “Hana laa gi doo hale, dau mee dela e hagadonu ga hai adu laa gi di goe.”

Di madagoaa hua deelaa, gei tangada hai hegau a maa gu hili.

Jesus e hagahili nia magi digau dogologo

(Mark 1.29-34; Luke 4.38-41)

14 Jesus ga hana gi di hale o Peter, ga gidee ia tinana di lodo o Peter e moe magi welengina. 15 Jesus ga bili gi di lima o maa, gei di welengina o maa gu hagalee. Di ahina deelaa ga nnoinua, ga daamada ga benebene Jesus.

16 Hiahi ia di mee, gei nia daangada gu dali mai nadau gau magi hagataalunga huaidu dogologo. Gei Jesus gu hagabagi nia hagataalunga huaidu gi telekai, geia gu hagahili nia magi digaula huogodoo. 17 Mee ne hai nia mee aanei bolo gi gila di mee a soukohp Isaiah ne haga modongoohia aga,

“Mee ne kae tadau magi ga hagahili tadau magi huogodoo.” ^d

Nia daangada ala belee daudali a Jesus

(Luke 9.57-62)

18 Jesus ga mmada gi digau dogologo ala e haganiga dono gili, geia ga helekai gi ana dama agoago bolo gi hula gi di baahi dela i golo di monowai. 19 Gei tangada haga dondonu haganoho ga hanimoi gi dono baahi, ga helekai, “Meenei, Tangada Agoago, deenei au gu togomaalia e daudali goe gi nia gowaa huogodoo ala e hana ginai goe.” 20 Jesus ga helekai, “Nia manu-“fox” iai nadau bongoo, nia manu mamaangi iai nadau waehongo. Gei Tama Tangada dono gowaa e hagamolooloo ia gi lala ai.” 21 Tangada labelaa i nia dama agoago a maa ga helekai, “Meenei, dugua mai gi di au e hana e danu dogu damana.” 22 Jesus ga helekai, “Daudalia mai au, dugua anga gi digau mmade gi danumia nadau gau mmade.”

Jesus e haga kila di madangi gono

(Mark 4.35-41; Luke 8.22-25)

23 Jesus ga gaga gi hongo di boodi, ana dama agoago ga hula madalia a mee. 24 Di madagoaa deelaa, di madangi gu gono huoloo, di boodi gu hahaawaa gu hoohoo ga abulu. Jesus nogo kii. 25 Ana dama agoago ga lloo adu gi mee, ga hangahanga, ga helekai, “Meenei Tagi, hagamaamaa ina gimaadou, gidaadou ga mmade!” 26 Jesus ga heeu, “Goodou e mmaadagu di aha? Godou hagadonu le e lligi!” Gei mee ga duu aga, ga helekai gi di madangi mono beau gi noho, gei gu kila loo! 27 Huogodoo gu goboina huoloo, ga helekai, “Tangada behee deenei? Di madangi mono beau hogi e hagalongo gi mee!”

Jesus e hagahili ana daane dogolua iai nau hagataalunga huaidu

(Mark 5.1-20; Luke 8.26-39)

28 Jesus ne dau adu gi tenua go Gadara i baahi i golo di monowai. Gei nia daane dogolua ala iai nau hagataalunga huaidu ga heetugi gi Jesus. Meemaa ne lloomoi i baahi nia daalunga gau mmade, meemaa e llamu dauwa huoloo, nia daangada e de hiihai e taele di ala deelaa. 29 Di madagoaa deelaa, meemaa ga wwolowwolo gi mee, “Goe go Tama a God, goe e hiihai gi di aha i gimaua? Goe ne hanimoi belee hagaduadua gimaua i mua di madagoaa donu belee hagaduadua ai?” 30 Nia biigi e logo nogo miami i di gowaa hoohoo mai. 31 Nia hagataalunga huaidu aalaa, ga tangi ang gi Jesus, “Maa goe ga hagabagi gimaadou gi daha, hagau ina gimaadou gi lodo nia biigi aalaa.” 32 Jesus ga helekai, “Hula!” Nia hagataalunga huaidu ga ulu gi daha mo nia daane aalaa, ga ulu gi lodo nia biigi. Gei nia biigi aalaa huogodoo ga llele ia gi lala di mololo gi lodo di monowai, gu mmaalemu. 33 Digau madamada humalia i nia biigi ga llele gi lodo di waahale, ga haga iloo nia mee huogodoo ala ne hai, mo nia mee ne hai gi nia daane dogolua ala nogo iai nia hagataalunga huaidu. 34 Digau o di waahale ga lloomoi huogodoo, ga heetugi gi Jesus, ga tangi gi mee gi hana gi daha mo di nadau gowaa.